Kevin De Bryuyne MLS klublari qiziqish doirasiga tushdi
«Napoli»ning hujumkor yarimhimoyachisi Kevin De Bryuyne faoliyatini boshqa jamoada davom ettirishi mumkin: MLSning bir nechta klubi 34 yoshli belgiyalik futbolchiga qiziqish bildirmoqda. Bu haqda jurnalist va insayder Nikolo Skira xabar berdi.
De Bryuynening «Napoli» bilan amaldagi shartnomasi 2027 yilgacha mo‘ljallangan bo‘lib, unda hamkorlikni yana bir yilga uzaytirish opsiyasi ham mavjud. Biroq o‘yinchi o‘z kelajagi borasida hali yakuniy qarorga kelgani yo‘q. Yarim himoyachi 2025 yilda «Manchester Siti»dan erkin agent maqomida «Napoli» safiga kelib qo‘shilgan edi.
Yakunlangan mavsumda u neapolliklar safida 21 ta o‘yinda maydonga tushib, 5 ta gol urdi va 4 ta golli uzatmani amalga oshirdi. Transfermarkt portali ma’lumotlariga ko‘ra, Kevin De Bryuynening ayni paytdagi bozor qiymati 8 million yevroni tashkil qiladi.
