Kerrik «MYU»ga sobiq shogirdini olib kelmoqchi
«Manchester Yunayted» «Midlsbro» yarimhimoyachisi Xeyden Xakni bilan shartnoma imzolashga qiziqish bildirmoqda. Futbolchi bilan muqaddam ushbu jamoada birga ishlagan va hozirda «qizil iblislar»ni boshqarayotgan Maykl Kerrik ushbu transferning asosiy tashabbuskori hisoblanadi. Bu haqda Northern Echo nashri xabar bermoqda.
Ortda qolgan mavsumda Xeyden Xakni barcha turnirlarda jami 41 ta uchrashuvda maydonga tushib, 6 ta gol urdi va 8 ta golli uzatmani oʻz hisobiga yozdirib qoʻydi. Transfermarkt portali berayotgan maʼlumotlarga koʻra, oʻyinchining ayni paytdagi bozor qiymati 32 million yevroni tashkil qiladi. Uning «Midlsbro» klubi bilan amaldagi shartnomasi 2027 yilning yoziga qadar moʻljallangan.
Eslatib oʻtamiz, yakunlangan mavsum natijalariga koʻra «Manchester Yunayted» Angliya Premyer-ligasi turnir jadvalida uchinchi oʻrinni egalladi.
