Kazemironing «MYU»ni tark etish sabablari maʼlum boʻldi
«Manchester Yunayted» va 33 yoshli yarimhimoyachi Kazemiro o‘rtasidagi hamkorlikni yakunlash qarori o‘zaro kelishuv asosida qabul qilingan. Bu haqda ESPN xabar bermoqda.
Manbaga ko‘ra, klub rahbariyatining yangi falsafasiga binoan, jamoada Kazemiro kabi yoshi katta va yuqori maosh oladigan futbolchilar qolishi istalmayapti. O‘z navbatida, braziliyalik yarimhimoyachi ham «qizil iblislar» safidagi faoliyati o‘z yakuniga yetganini anglagan.
22 yanvar, payshanba kuni «Manchester Yunayted» mavsum yakunida futbolchi bilan xayrlashishini rasman e’lon qildi.
Kazemiro «Manchester Yunayted»ga 2022 yilda Madridning «Real» klubidan kelib qo‘shilgan. Shu vaqt davomida u barcha musobaqalarda 146 ta uchrashuvda maydonga tushib, 21 ta gol va 13 ta golli uzatma muallifiga aylangan. Transfermarkt portali futbolchining bozor qiymatini 8 million yevroga baholamoqda.
