«Katta mablag'lar» — BAA futbolchilariga O‘zbekiston ustidan qozoniladigan g‘alaba uchun katta mukofot va’da qilindi
5 iyun kuni O‘zbekiston milliy terma jamoasi Jahon chempionati saralash bosqichi doirasida BAAga qarshi maydonga tushadi. Bu o‘yin ikki jamoa uchun ham hal qiluvchi ahamiyat kasb etadi.
Avvalroq BAA futbol assotsiatsiyasi prezidenti shayx Hamdon ibn Muborak terma jamoa mashg‘ulotida ishtirok etgani va futbolchilar bilan uchrashgani haqida xabar bergan edik. U jamoa a’zolariga g‘alabaning ahamiyatini alohida ta’kidlagan.
Mahalliy OAVning yozishicha, shayx Hamdon mashg‘ulotga bejiz tashrif buyurmagan. Xabarlarga ko‘ra, u futbolchilar va murabbiylar shtabiga O‘zbekiston ustidan g‘alaba qozonilsa, katta pul mukofotlari berilishini va’da qilgan.
Manbalarga ko‘ra, gap millionlab AQSH dollari miqdoridagi mukofot haqida ketmoqda. Arab mamlakatlari bunga o‘xshash holatlarga ilgari ham murojaat qilgan — ular yuqori sport natijalari uchun juda katta mukofotlar taqdim etishi bilan mashhur.
