Karlo Anchelotti Braziliya milliy jamoasida 2030 yilgacha qoladigan bo‘ldi — ESPN
Italiyalik mutaxassis Karlo Anchelotti Braziliya terma jamoasi bosh murabbiyligida 2030 yilga qadar faoliyatini davom ettiradi. Bu haqda ESPN nashri xabar bermoqda.
Avvalroq Braziliya futbol konfederatsiyasi (CBF) va murabbiyning o‘zi hamkorlikni uzaytirish niyatida ekanliklarini ma’lum qilishgan edi.
Manbaning ta’kidlashicha, konfederatsiya shu haftaning boshida yangi shartnomaning barcha tafsilotlarini kelishib olgan va tayyor loyihani Anchelottiga yuborgan. Hozirda tashkilot murabbiyning imzosini kutmoqda.
Shartnoma yana to‘rt yilga uzaytirilgani haqidagi rasmiy bayonot yaqin kunlarda e’lon qilinishi kutilmoqda.
Qayd etilishicha, mutaxassisning yangi kelishuv bo‘yicha maoshi o‘zgarishsiz qoladi. Anchelotti 2025 yilning may oyida kelishilganidek, yiliga 10 million yevro ishlab topishda davom etadi. Ta’kidlash joizki, ushbu summa Braziliya terma jamoasi bosh murabbiylari tarixidagi eng yuqori maosh hisoblanadi.
