Kanseluga intizomiy jazo qo‘llanilishi mumkin
Portugaliyalik himoyachi Joau Kanselu "Barselona"ga o‘tishni kutayotgani sababli "Al-Hilol"ning mavsumoldi yig‘iniga qo‘shilmadi. Shu bois Saudiya klubi futbolchiga nisbatan intizomiy choralar qo‘llashi mumkin.
Ma'lumotlarga ko‘ra, Kanselu ta'tildan so‘ng jamoa bilan Avstriyadagi yig‘inga yetib borishi kerak edi. Biroq u Portugaliyada qolib, individual mashg‘ulotlarni davom ettirmoqda. Futbolchining klubdan ruxsat olgan-olmagani hozircha rasman tasdiqlanmagan.
31 yoshli himoyachi faoliyatini "Barselona"da davom ettirishni istamoqda. Kataloniya klubi ham futbolchini to‘liq transfer qilish ustida "Al-Hilol" bilan muzokaralarni davom ettirmoqda. Tomonlar kelishuvga yaqin ekani aytilmoqda.
Agar Kanseluning mavsumoldi yig‘inida qatnashmagani uzrsiz deb topilsa, "Al-Hilol" klub ichki nizomiga muvofiq futbolchini jarimaga tortishi yoki boshqa intizomiy jazo choralarini qo‘llashi mumkin.
