Kamoliddin Tojiyev: «Yutish uchun oxirigacha kurashish kerak»
"Xorazm" bilan bellashuvdan so'ng “Paxtakor” bosh murabbiyi matbuot anjumanida qatnashdi.
“O'yin haqida gapiradigan bo'lsak, uchrashuv boshidayoq o'tkazib yuborilgan gol baribir biroz ruhiy ta'sir ko'rsatdi. Keyin o'zimizga keldik, gol urdik, yaxshi vaziyatlar yaratdik. Yigitlar bugun yaxshi harakat qilishdi, oxirigacha kurashishdi. Ikkinchi golni ham kiritdik va yana ko'plab vaziyatlar bo'ldi, biroq ulardan foydalana olmadik. Endi, bu — futbol. Har o'yinda shunday kurashmasak, g'alaba qozona olmaymiz. Bugun barcha yigitlar kurashib, oxirigacha o'ynab, juda muhim g'alabani qo'lga kiritishdi. Ularning barchasiga rahmat aytaman.
O'tgan uchrashuvda ham 1:0 dan keyin himoyaga o'tib olgandik. Hozir bu ustida ishlayapmiz, yigitlar bilan gaplashyapmiz. Balki, bu biroz ruhiy holat bilan bog'liqdir. Xudo xohlasa, bu kamchilikni bartaraf etamiz. Biz ularga "orqaga yotib olinglar", demayapmiz, balki ular ham gol o'tkazib yuborishdan qo'rqishyaptimi, bilmadim. Lekin bu jihat ustida ishlayapmiz, chunki ko'p o'yinlarda shu holat kuzatilmoqda”, - deyiladi klub xabarida.
