Joze Mourinyu «Real»ga «Arsenal» himoyachisini olib kelmoqchi
Avvalroq portugaliyalik mutaxassis Madrid klubi bosh murabbiyiga aylanishi mumkinligi xabar qilingandi.
FOTO: Getty Images
Yaqin orada «Real»ga bosh murabbiy etib tayinlanishi kutilayotgan Joze Mourinyu klub rahbariyati oldiga birinchi transfer vazifasini qo‘ydi — portugaliyalik mutaxassis «Arsenal» himoyachisi Rikkardo Kalafiorini sotib olishni so‘radi. Bu haqda jurnalist Ramon Alvares de Mon ijtimoiy tarmoqlarda xabar berdi.
Manbaga ko‘ra, Mourinyuni futbolchining universalligi hayratda qoldirgan — Kalafiori ham himoya markazida, ham chap qanotda birdek harakat qila oladi.
Ortda qolgan mavsumda futbolchi «Arsenal» safida barcha turnirlarda 36 ta o‘yinda maydonga tushib, 1 ta gol urdi va 3 ta golli uzatmani amalga oshirdi. Transfermarkt portali ma’lumotlariga ko‘ra, uning bozor qiymati 55 million yevroni tashkil qiladi.
Nasrullo Karimov
Jurnalist