Jonni Kardozo operatsiya qilinadi
«Atletiko Madrid» va AQSH terma jamoasi yarimhimoyachisi Jonni Kardozo o‘ng oyoq to‘pig‘idan olgan jarohati sababli operatsiya qilinadi. Bu haqda Madrid klubining rasmiy sayti xabar tarqatdi.
Kardozo o‘tgan haftada «matraschilar»ning mashg‘uloti davomida jarohat olgan edi. 24 yoshli xavbekda «bo‘g‘imning shikastlanishi bilan kuzatilgan jiddiy bog‘lamlar cho‘zilishi» tashxisi qo‘yildi. Yaqin vaqt ichida futbolchi jarrohlik amaliyotini o‘taydi.
Ispaniya OAVlarining ma’lumotlariga ko‘ra, Kardozoning tiklanish jarayoni 3 oydan 6 oygacha davom etishi mumkin. Shu tariqa, futbolchi joriy yilning 11 iyunidan 19 iyuliga qadar AQSH, Kanada va Meksika maydonlarida bo‘lib o‘tadigan JCH-2026ni o‘tkazib yuborishi ehtimoli yuqori.
Eslatib o‘tamiz, turnirning guruh bosqichida AQSH terma jamoasi Turkiya, Paragvay va Avstraliya termalariga qarshi bahs olib boradi.
