Joan Laporta «Barselona» prezidentligidan isteʼfoga chiqdi
“Barselona” klubining amaldagi prezidenti Joan Laporta hamda direktorlar kengashining bir nechta aʼzolari 15 mart kuni bo‘lib o‘tadigan saylovlarda yana nomzod sifatida qatnashish maqsadida isteʼfoga chiqdi. Bu haqda klubning rasmiy sayti xabar berdi.
Isteʼfo 9 fevral kungi navbatdagi direktorlar kengashi yig‘ilishida qabul qilingan.
Maʼlumot uchun, 63 yoshli Laporta “Barselona”ni 2003–2010 yillar oralig‘ida boshqargan va 2021 yilda yana klub prezidenti etib saylangan. Uning rahbarligi davrida kataloniyaliklar Ispaniya chempionatida 6 marta g‘olib chiqqan, Qirol kubogini 3 bor, Ispaniya Superkubogini esa 6 marta qo‘lga kiritgan. Shuningdek, klub 2 marta Chempionlar Ligasida zafar quchib, Yevropa Superkubogi hamda Klublar o‘rtasidagi Jahon chempionatida bir martadan g‘alaba qozongan.
