Jeyms Milner APL tarixida eng ko‘p o‘yin o‘tkazgan futbolchiga aylandi
Angliya futboli tarixida yangi sahifa ochildi. «Brayton» yarimhimoyachisi, 40 yoshli faxriy futbolchi Jeyms Milner Premyer-liga (APL) tarixida o‘tkazilgan o‘yinlar soni bo‘yicha mutloq rekordni o‘rnatdi.
Angliya chempionatining 27-turi doirasidagi «Brentford»ga qarshi bahsda Milner «chag‘alaylar»ning asosiy tarkibida maydonga tushdi. Ushbu uchrashuv ingliz futbolchisi uchun turnirdagi 654-o‘yin bo‘ldi. Shu tariqa, u uzoq yillik rekordchi Garet Barrini (653 o‘yin) ortda qoldirib, turnir tarixidagi eng tajribali futbolchiga aylandi.
APL tarixida eng koʻp oʻyin oʻtkazgan top-5 futbolchi:
- Jeyms Milner – 654 ta oʻyin
- Garet Barri – 653 ta oʻyin
- Rayan Giggz – 632 ta oʻyin
- Frenk Lempard – 609 ta oʻyin
- Devid Jeyms – 572 ta oʻyin
Jeyms Milner oʻzining boy faoliyati davomida «Lids», «Nyukasl», «Aston Villa» va «Manchester Siti» kabi jamoalar sharafini himoya qilgan. Uning faoliyatidagi eng yorqin davr «Liverpul» klubi bilan bogʻliq boʻlib, u mazkur jamoa libosida eng koʻp — 230 ta uchrashuvda maydonga tushgan.
