Jennaro Gattuzo Italiya milliy jamoasi bosh murabbiyligidan ozod etiladi — Romano
Taniqli mutaxassis 2025 yildan buyon «Skuadra Adzurra»ni boshqarib kelayotgandi.
FOTO: Getty Images
Italiya terma jamoasi bosh murabbiyi Jennaro Gattuzo JCH-2026 yo‘llanmasi uchun kechgan hal qiluvchi pley-off bahsida Bosniya va Gersegovinaga imkoniyatni boy berganidan so‘ng (1:1, penaltilar seriyasida 1:4), o‘z lavozimini tark etadi. Bu haqda taniqli jurnalist va insayder Fabrisio Romano xabar bermoqda.
«Skuadra Adzurra» o‘z tarixida ilk bor ketma-ket uchta Jahon chempionatini o‘tkazib yuboradigan bo‘ldi. Italiyaliklar oxirgi marta 2014 yilgi mundialda ishtirok etishgan edi. Ta’kidlash joizki, Italiya terma jamoasi to‘rt karra jahon chempioni hisoblanadi.
Gattuzo Italiya terma jamoasini 2025 yildan buyon boshqarib kelayotgan edi. Bungacha mutaxassis «Xayduk», «Marsel», «Napoli» va «Milan» kabi klublarda faoliyat yuritgan.
Nasrullo Karimov
Jurnalist