Javohir Sindarov fevral oyida rasmiy freestyle bo‘yicha jahon chempionatida ishtirok etadi!
Xalqaro shaxmat federatsiyasi (FIDE) va Freestyle Chess Operations GmbH kompaniyasi ilk bor rasmiy FIDE freestyle shaxmat bo‘yicha jahon chempionatini o‘tkazish bo‘yicha kelishuvga erishdi. Musobaqa 2026-yil 13–15-fevral kunlari Vayzenxaus (Germaniya) shahrida bo‘lib o‘tadi. Turnir FIDE homiyligida va Freestyle Chess bilan hamkorlikda tashkil etiladi.
FIDE freestyle bo‘yicha jahon chempionati avval o‘tkazilgan Fisher shaxmati (Chess960) formatidagi FIDE turnirlarining (2019 va 2022-yillar) mantiqiy davomi hisoblanadi va unda 8 nafar shaxmatchi ishtirok etadi.
Shulardan 6 nafar ishtirokchi 2025-yilgi Freestyle Chess Grand Slam Tour natijalariga ko‘ra yo‘llanma oldi:
Magnus Karlsen
Levon Aronyan
Fabiano Karuana
Vinsent Keymer
Arjun Erigaisi
Javohir Sindarov
Yana 2 ta o‘rin alohida tartibda taqsimlanadi:
- bittasini FIDE tanlaydi,
- ikkinchisini Freestyle Chess tashkiloti belgilaydi.
Freestyle Chess allaqachon Hans Nimanni Las-Vegasdagi yorqin chiqishi uchun nomzod sifatida ko‘rsatgan.
FIDE esa sakkizinchi ishtirokchini aniqlash uchun Chess.com platformasida onlayn saralash turniri o‘tkazadi (taxminan 14–15-yanvar kunlari).
