Janni Infantino Isroil jamoalarini xalqaro musobaqalardan chetlatish g‘oyasini rad etdi
FIFA prezidenti Janni Infantino Isroil jamoalarini xalqaro turnirlardan chetlatish borasidagi chaqiriqlarga munosabat bildirdi. Uning so‘zlariga ko‘ra, tashkilot hozircha bunday choralar ko‘rish niyatida emas.
«FIFA Nizomi qoidalarini talqin qilish kontekstida Iordan daryosining G‘arbiy sohilidagi yakuniy huquqiy maqom xalqaro ommaviy huquq doirasida ochiq va o‘ta murakkab masala bo‘lib qolayotganini hisobga olsak, hozirda hech qanday chora ko‘rilmasligi kerak», — deya Infantinoning so‘zlarini keltirdi jurnalist Rob Harris.
Avvalroq G‘azo sektoridagi vaziyat tufayli Isroil terma jamoasini xalqaro musobaqalardan chetlatish bo‘yicha ko‘plab murojaatlar bo‘lgani xabar qilingan edi.
Ma’lumot uchun, 2022 yilning fevral oyidan buyon Rossiyaning barcha jamoalari va terma jamoalari Ukrainadagi harbiy harakatlar sababli xalqaro turnirlardan chetlatilgan holatda qolmoqda.
