“Inter” “Liverpul” yarim himoyachisi Kertis Jons transferiga yaqin turibdi
Italiyaning “Inter” klubi “Liverpul” yarim himoyachisi Kertis Jonsni o‘z safiga qo‘shib olishga yaqin turibdi. 25 yoshli angliyalik futbolchi Milan klubiga o‘tishga rozilik bildirgan va tomonlar o‘rtasidagi muzokaralar yakuniy bosqichga yaqinlashmoqda.
Manbaga ko‘ra, Jons “Inter”ga o‘tishga yozgi transfer oynasi ochilishidan avvalroq rozilik bergan. Klublar o‘rtasidagi muzokaralar oson kechmayotgan bo‘lsa-da, transferni amalga oshirish ustida ishlayotgan vositachilar “Liverpul” yakunda kelishuvga rozilik berishiga ishonmoqda.
“Inter” futbolchini qo‘lga kiritish borasida jiddiy harakat qilmoqda va yaqin vaqt ichida “Liverpul”ga yangi taklif yuborishni rejalashtirgan. Shu bilan birga, Milan klubi Jonsning shaxsiy shartnoma shartlarini to‘liq kelishib olgan. Transfer qiymati bonuslarni hisobga olmaganda taxminan 30 million yevroni tashkil etishi mumkin.
Ma’lumot uchun, Kertis Jons “Liverpul” akademiyasi tarbiyalanuvchisi hisoblanadi. U faoliyatining asosiy qismini mersisaydliklar safida o‘tkazib kelgan. Agar tomonlar yakuniy kelishuvga erishsa, angliyalik yarim himoyachi faoliyatini ilk bor Angliyadan tashqarida davom ettiradi.
