Husanov “Man City”ni tark etib, “Man United”ga o‘tadimi?
O‘zbekistonlik himoyachi Abduqodir Husanov faoliyatini “Manchester United” jamoasida davom ettirishi mumkin. Bu haqda Scout in Eurasia nashri o‘z manbalariga tayanib xabar berdi.
Husanov joriy yil yanvar oyida “Manchester City” safiga qo‘shilgan edi, lekin shu vaqtgacha u juda kam maydonga tushdi. Jumladan, klublar o‘rtasidagi jahon chempionatida faqat bitta uchrashuvda ishtirok etgan.
Ma’lumotlarga ko‘ra, “United” skautlari vaziyatni yaqindan kuzatmoqda. 21 yoshli futbolchi Markaziy Osiyoda eng istiqbolli himoyachilardan biri sifatida baholanadi. Transfermarkt portaliga ko‘ra, uning bozor qiymati 35 million yevroga teng.
Nashr skauti shunday degan:
«Men Husanovni birinchi bo‘lib kashf qilganman. Markaziy Osiyo futbolchilarida katta salohiyat bor, deb hisoblayman».
Himoyachi “City” safida debyut qilgan bo‘lsa-da, so‘nggi uch oyda faqat bir marta asosiy tarkibda maydonga tushgan. Bu holatdan “United” foydalanishi mumkin — transfer oynasida klub tomonidan rasmiy muzokaralar boshlanishi kutilmoqda.
“Manchester United”ga o‘tish Husanov uchun katta bosqich bo‘lishi mumkin. “Old Trafford” jamoasi Angliyaning eng sovrinli klublaridan biri: 13 marta APL, 13 bor Angliya kubogi va 3 marta Chempionlar ligasi g‘olibligini qo‘lga kiritgan.
Bu transfer orqali Husanov o‘zini Yevropa futbolida to‘laqonli namoyon etishi mumkin.
