Holand «Manchester Siti»dagi kelajagi haqida fikr bildirdi
“Manchester Siti” hujumchisi Erling Holand faoliyatining hozirgi bosqichi va klub istiqbollari haqida fikr bildirdi.
“So‘nggi bir yil ichida ko‘plab o‘zgarishlar yuz berdi. Jamoada uzoq vaqtdan beri o‘ynab kelayotgan futbolchilar ko‘p, shuning uchun yangi kelganlarga vaqt kerak. Yangi ligaga, yangi mamlakatga kelish oson emas — moslashish uchun vaqt talab etiladi. O‘ylaymanki, bizni hayajonli davrlar kutmoqda va men ularning bir qismi bo‘lishni sabrsizlik bilan kutyapman.
Men juda baxtliman va bundan keyin nima bo‘lishini hayajon bilan kutyapman, chunki hozir “Siti” uchun klub sifatida ham, men uchun o‘yinchi sifatida ham haqiqatan ham hayajonli davr. Men “Siti” bilan hamkorlikni davom ettirishni intiqlik bilan kutyapman”, — deya Holandning so‘zlarini keltiradi ESPN.
APLning 33-turidan so‘ng “Manchester Siti” 70 ochko bilan turnir jadvalining ikkinchi pog‘onasida bormoqda. Peshqadam “Arsenal”dan uch ochko ortda qolmoqda, biroq “shaharliklar”da yana bitta zaxira o‘yini bor. Angliya Kubogi finalida “Manchester Siti” 16-may kuni “Chelsi”ga qarshi o‘ynaydi.
