Harri Keyn «Real»ga qarshi oʻyin oldidan «Bavariya» mashgʻulotlariga qaytdi
Myunxenning «Bavariya» klubi hujumchisi Harri Keyn xalqaro tanaffus vaqtida olgan jarohatidan so‘ng safga qaytdi va jamoa mashg‘ulotlariga qo‘shildi. Bu haqda jurnalist Florian Plettenberg o‘zining ijtimoiy tarmoqlardagi sahifasida ma’lum qildi.
Manbaning xabar berishicha, Keyn UEFA Chempionlar Ligasi doirasida Madridning «Real» klubiga qarshi kechadigan muhim bahsga tayyorgarlik ko‘rmoqda. Mazkur uchrashuv ertaga, 7 aprel kuni «Santyago Bernabeu» stadionida bo‘lib o‘tishi belgilangan.
Shuningdek, so‘nggi vaqtlarda ingliz hujumchisining jamoani tark etishi borasidagi xabarlar ko‘paygan bir paytda, «Bavariya» rahbariyati o‘z pozitsiyasini aniqlashtirib oldi. Klub sport direktori Maks Eberl myunxenliklar Harri Keynni tarkibda olib qolishga qat’iy qaror qilganliklarini bildirgan.
Eslatib o‘tamiz, Harri Keyn jarohati sababli jamoasining so‘nggi o‘yinini o‘tkazib yuborishga majbur bo‘lgan edi. Uning safga qaytishi myunxenliklarning hujum chizig‘ini sezilarli darajada kuchaytirishi kutilmoqda.
