Hans-Diter Flik «Barselona» bilan yangi shartnoma bo‘yicha kelishuvga erishdi
«Barselona» jamoasining germaniyalik bosh murabbiyi Hans-Diter Flik klub bilan yangi shartnoma shartlarini kelishib oldi. Bu haqda insayder Fabrisio Romano xabar bermoqda.
Manbaga ko‘ra, mutaxassis bilan tuziladigan yangi bitim 2028 yilning yoziga qadar mo‘ljallangan bo‘lib, u shartnomani yana bir yilga — 2029 yilgacha uzaytirish bandini ham o‘z ichiga oladi.
Xabarda aytilishicha, barcha tafsilotlar bir necha hafta oldin erishilgan og‘zaki kelishuvdan so‘ng to‘liq muvofiqlashtirilgan. Hans-Diter Flikning agenti Pini Zaxavi va «Barselona» o‘rtasidagi muzokaralar muvaffaqiyatli yakunlangan.
Murabbiyning klub bilan amaldagi shartnomasi 2027 yilning yoziga qadar imzolangan edi. Kelishuv uzaytirilgani haqidagi rasmiy bayonot birozdan keyin e’lon qilinishi kutilmoqda.
