Gvardiola murabbiylik faoliyatini yakunlaganidan soʻng nima bilan mashgʻul boʻlishini aytdi
«Manchester Siti» bosh murabbiyi Pep Gvardiola oʻzining murabbiylik faoliyatini yakunlagach, hayotini qanday davom ettirmoqchi ekanini soʻzlab berdi.
«Ovqat tayyorlashni oʻrganmoqchiman, lekin restoran ochish niyatim yoʻq. Shuningdek, fransuz tilini oʻrganmoqchiman, ha, aynan shuni. Bolalarim bilan koʻproq vaqt oʻtkazishim kerak — hozir bunga imkon yoʻq. Oilam, opa-singillarim va birodarlarim bilan ham tez-tez uchrasholmayman, ularga ham eʼtibor qaratmoqchiman. Sayohat qilishni istayman. Juda koʻp narsalar bor, ilgari bajara olmaganlarimni albatta qilaman!
Dunyo boʻylab minglab, millionlab joylar bor — ularni koʻrishni istayman: ko‘rgazmalar, konsertlar yoki shunchaki uyda hech narsa qilmay oʻtirish — bu ham ajoyib. Balki shundan boshlarmiz, yomon emas, toʻgʻrimi? Juda koʻp ishlar qilish kerak», — dedi Gvardiola.
Eslatib oʻtamiz, «Manchester Siti» APLning 11-turida «Liverpul» bilan bahs olib boradi. Ushbu uchrashuv Gvardiola uchun murabbiylik faoliyatidagi 1000-o‘yin boʻladi.
