Germaniya terma jamoasi Jahon chempionatlari tarixida gol urish boʻyicha rekord oʻrnatdi
Germaniya milliy terma jamoasi Jahon chempionatlari finallarida urilgan gollar soni boʻyicha yangi rekord qayd etdi. Bu voqea JCh-2026 «E» guruhi 1-turi doirasida Germaniya terma jamoasi Kyurasaoni 7:1 hisobida tor-mor etgan oʻyinda sodir boʻldi. Uchrashuv AQSHning Xyuston shahridagi «En-Er-Dji Stedium» stadionida boʻlib oʻtdi. Bahsda marokashlik Jalal Jayed bosh hakamlik qildi.
Nemislar ushbu musobaqa finallarida kiritgan gollari sonini 239 taga yetkazib olishdi va bu koʻrsatkich boʻyicha Braziliya terma jamoasini (238 ta gol) ortda qoldirib, mutloq peshqadamga aylanishdi.
Eslatib oʻtamiz, futbol boʻyicha 2026-yilgi Jahon chempionati 11-iyundan 19-iyulgacha AQSH, Kanada va Meksika maydonlarida boʻlib oʻtmoqda. Amaldagi jahon chempioni Argentina terma jamoasi hisoblanadi. 2022-yilgi dunyo birinchiligi finalida Argentina milliy jamoasi Fransiya bilan toʻqnash kelgan. Oʻyinning asosiy vaqti 3:3 hisobida yakunlangan, biroq penaltilar seriyasida argentinaliklar kuchliroq chiqqan (4:2).
