Gandbol. Turkmaniston ham mag'lub etildi
Pokistonning Faysalobod shahrida gandbol bo‘yicha U-17 va U-19 qizlar jamoalari o‘rtasida uyushtirilayotgan Xalqaro gandbol federatsiyasi kubogining III - Markaziy Osiyo bosqichi davom etmoqda.
Bugun O‘zbekiston U-19 va Turkmaniston U-19 terma jamoalari o‘zaro bellashdi. Aytish lozim, raqiblarimiz ham hamyurtlarimiz kabi mag‘lubiyatsiz kelayotgan bo‘lib, bu qarama-qarshilikni finalga qiyoslash mumkin edi.
Shu jihatdan, gandbolchi qizlarimiz o‘yinning muhimligidan ko‘ngildan his qilishdi. Tabiiyki, ularning sa’y-harakati besamar qolmadi. Vakilalarimiz 26:18 hisobida zafar quchishdi. Ertaga Tojikiston jamoasi bilan bo‘lib o‘tadigan uchrashuv natijasidan qat’iy nazar, jamoamiz muddatidan oldin IHF kubogining U-19 birinchiligi g‘olibligini qo‘lga kiritishdi va navbatdagi bosqichga yo‘l oldi.
