Gabriel Magalyaesh FIFA kunlaridagi oʻrtoqlik oʻyinlarini oʻtkazib yuboradi
Londonning «Arsenal» klubi va Braziliya terma jamoasi himoyachisi Gabriel Magalyaesh «pentakampeonlar»ning Fransiya va Xorvatiyaga qarshi o‘tkaziladigan o‘rtoqlik uchrashuvlarini o‘tkazib yuboradi. Bu haqda Braziliya futbol konfederatsiyasining X ijtimoiy tarmog‘idagi rasmiy sahifasi xabar berdi.
22 mart kuni Angliya Liga Kubogi finali doirasida «Manchester Siti»ga (0:2) qarshi kechgan bahsdan so‘ng, futbolchi o‘ng tizzasidagi og‘riqdan shikoyat qilgan. Tibbiy tekshiruv natijalari Magalyaeshning FIFA doirasidagi xalqaro uchrashuvlarda ishtirok etishga tayyor emasligini tasdiqladi. Terma jamoa tarkibida uning o‘rniga boshqa futbolchi chaqirilmasligi ma’lum qilindi.
Eslatib o‘tamiz, Braziliya terma jamoasi 26 mart kuni Fransiya, 1 aprelda esa Xorvatiya bilan kuch sinashadi.
2026 yilgi Jahon chempionati qur’a natijalariga ko‘ra, Braziliya terma jamoasi «C» guruhida Marokash, Gaiti va Shotlandiya bilan bir guruhdan joy olgan.
