Futzal. Terma jamoamiz Ar-Riyodda ilk mashg‘ulotni o‘tkazdi
VI Islom birdamligi o‘yinlarida ishtirok etish uchun bugun Saudiya Arabistoni poytaxti — Ar-Riyod shahriga yetib kelgan O‘zbekiston milliy terma jamoasi kunning ikkinchi yarmida dastlabki mashg‘ulotni o‘tkazdi.
Nodir Eliboev boshchiligidagi murabbiylar shtabi bugungi jismoniy tayyorgarlik mashqlariga e’tibor qaratishdi. Trenerajyor zalida kechgan jarayon yuqori sur’atda va ishchan ruhda o‘tdi.
Terma jamoa o'yinchilarining kayfiyati a’lo, jamoada ko‘tarinki muhit hukm surmoqda. Barcha futzalchilar mashg‘ulotlarda chin dildan ter to‘kib, murabbiylar tomonidan berilgan ko‘rsatma va topshiriqlarni a’lo darajada bajarishdi.
Eslatib o‘tamiz, ertaga jamoalarga musobaqa oldidan Islom birdamligi o‘yinlari o‘tkaziladigan Olimpiya sport majmuasi o‘yin zalida rasmiy mashg‘ulot o‘tkazish imkoniyati beriladi.
O‘zbekiston milliy terma jamoasi musobaqadagi ilk uchrashuvini 4-noyabr kuni mahalliy vaqt bilan soat 19:00 da Saudiya Arabistoni terma jamoasiga qarshi o‘tkazadi.
