Futzal. Sovrinli o‘rinlar uchun da’vogarlar saralandi
Bugun Jizzax shahridagi Viloyat futbol akademiyasi sport zalida futzal bo‘yicha Hududiy liga g‘oliblari Respublika turnirining chorak final uchrashuvlari bo‘lib o‘tdi. Natijalarga ko‘ra, musobaqaning sovrinli o‘rinlari uchun kurashni davom ettiradigan yarim finalchilar nomi ma’lum bo‘ldi.
Dastlabki chorak final bahsida Qashqadaryo viloyatining “Chiroqchi” hamda Xorazm viloyatining “Xonqa” jamoalari o‘zaro kuch sinashdi. Gollarga boy va murosasiz kechgan uchrashuvda xorazmliklar 6:3 hisobida zafar quchib, yarim final yo‘llanmasini qo‘lga kiritishdi.
Jizzax viloyati chempioni — “Ezgu niyat” jamoasi esa Andijon Davlat Universiteti vakillariga qarshi bahsda ham o‘zining jiddiy maqsadlarini namoyish etdi. Musobaqa mezbonlari yirik hisobdagi g‘alabani rasmiylashtirishdi — 10:2.
Toshkentning “Parma” jamoasi hamda Samarqandning “Dinamo U-18” jamoasi o‘rtasidagi uchrashuv keskin kurashlarga boy bo‘ldi. Asosiy vaqtda 2:2 hisobi qayd etilgan bo‘lsa, penaltilar seriyasida omad poytaxtliklarga kulib boqdi — 5:4.
So‘nggi chorak final bahsida Toshkent shahrining TXO jamoasi Buxoro Davlat Universiteti jamoasini 5:4 hisobida mag‘lub etib, yarim finalga yo‘l oldi.
Eslatib o‘tamiz, 12-iyundan boshlab turnirning barcha uchrashuvlari O‘zbekiston futzal federatsiyasining YouTube kanali orqali jonli efirda namoyish etiladi.
Chorak final | 11-iyun
“Chiroqchi” – “Xonqa” – 3:6
“Ezgu niyat” – ADU – 10:2
“Parma” – “Dinamo U-18” – 2:2 (penaltilar – 5:4)
BuxDU – TXO – 4:5
Yarim final | 12-iyun
10:00 — “Xonqa” va “Parma”
11:00 — “Ezgu niyat” va TXO