Futzal. O’smirlarimiz Jizzaxdagi yig’inni yakunladi
Avval xabar berganimizdek, O’zbekiston o’smirlar terma jamoasi III Osiyo yoshlar o‘yinlariga tayyorgarlik doirasidagi navbatdagi o‘quv-mashg‘ulot yig‘inini Jizzax shahrida o‘tkazdi. Besh kun davom etgan mashg‘ulotlar Jizzax futbol akademiyasi zalida olib borildi va bugun Samarqandning “Dinamo” jamoasi yoshlar tarkibiga qarshi nazorat uchrashuvi bilan yakunlandi.
Dilshod Rahmatov boshchiligidagi o’smirlarimiz endi Toshkent shahrida to‘planadi va musobaqaga tayyorgarlikning so‘nggi bosqichini o‘tkazadi. Toshkentdagi yig‘in doirasida Qirg‘iziston o’smirlar terma jamoasiga qarshi nazorat bahsi o‘tkazilishi ham rejalashtirilgan.
Eslatib o‘tamiz, o’smirlar terma jamoamiz joriy yilning 22–31 oktabr kunlari Bahraynda bo‘lib o‘tadigan III Osiyo yoshlar o‘yinlarida ishtirok etadi.
