Futzal bahsida raqibasining boshiga ikki marta tepgan futbolchi 5 yilga chetlatildi
Braziliyaning Eusebio shahri ayollar futzal chempionatida RDJ Sport va As Resenhas jamoalari o‘rtasidagi uchrashuv dahshatli mojaro bilan yakunlandi. Ikkinchi bo‘limda hisob RDJ Sport foydasiga 1:0 bo‘lib turgan paytda As Resenhas futbolchilaridan biri raqibasiga hujum qildi. U parketda yotgan futzalchining boshiga ketma-ket ikki marta oyoq bilan zarba berdi.
Mojaroni to‘xtatish uchun RDJ Sportning yana bir futbolchisi aralashdi. Biroq tajovuzkor sportchi unga ham tashlanib, yuziga bir necha bor musht tushirdi. Voqea maydondagi futbolchilar va tomoshabinlarda keskin norozilik uyg‘otdi, uchrashuv esa vaqtincha to‘xtatildi.
Eusebio shahar ma'muriyati hodisadan afsusda ekanini bildirib, bunday zo‘ravonlik sport tamoyillariga mutlaqo zid ekanini ta'kidladi. Hujum qilgan futzalchi keyingi besh yil davomida shaharda tashkil etiladigan barcha sport musobaqalarida qatnashish huquqidan mahrum qilindi.
