Futzal. 2-tur start olishiga 2 kun qoldi
Yana ikki kundan so‘ng Andijon shahri markazidagi muhtasham “Universal” sport majmuasida futzal bo‘yicha mamlakat XXIX milliy chempionati – Oliy liganing 2-tur uchrashuvlariga start beriladi. Vodiylik futzal ishqibozlari olti kun mobaynida har kuni uchtadan – jami 18 ta murosasiz, shiddatli o‘yinlarning shohidi bo‘lishadi.
Toshkentda o‘tkazilgan dastlabki tur bahslaridan so‘ng, chempionatimizda qo‘shhokimlik kuzatilyapti. Qarshining “Nasaf” hamda Toshkentning SQB jamoalari yuz foizlik ochko jamg‘arishib, peshqadamlik qilishmoqda. Vohaliklar kiritilgan va o‘tkazib yuborilgan to‘plar nisbatiga ko‘ra birinchi, poytaxtliklar esa ikkinchi pog‘onani egallab turishibdi. Jizzaxning BMB hamda Samarqandning “Dinamo” jamoalari esa bittadan uchrashuvda durang qayd etishib, 7 tadan ochko bilan 3-4-o‘rinlarni bo‘lib turishibdi. Ilk turni “Lokomotiv” hamda OKMK ham ishonchli o‘tkazdi va 6 tadan ochko jamg‘arishib, keyingi pog‘onalarni band etishgan.
Dastlabki uchrashuvda amaldagi chempion bilan durang qayd etgan “Oil Star” kutilmaganda ikkinchi o‘yinni boy berib qo‘ydi. Ammo o‘tgan mavsum vitse-chempioni uchinchi o‘yin kuni o‘ziga keldi va muhim g‘alaba evaziga ochkolari sonini 4 taga yetkazib oldi. “Bunyodkor”da 3, “Qizilqum”da 1 ochko bor. Uchta klub – “Surxon”, “Maksam-Chirchiq” hamda “Neftchi” hozircha ochkoga ega emas.
