\"Fulhem\" Gonsalo Garsiyani \"Real Madrid\"dan sotib oldi
Angliyaning "Fulhem" klubi Madridning "Real" jamoasi hujumchisi Gonsalo Garsiya transferini yakunladi. Bu haqda taniqli insayder Fabritsio Romano o‘zining mashhur Here we go! iborasi bilan ma’lum qildi.
Manbaga ko‘ra, "Fulhem" 22 yoshli ispaniyalik hujumchi uchun 40 million yevro kafolatlangan transfer puli to‘laydi. Shuningdek, kelishuvga yana 2 million yevrolik bonuslar kiritilgan. Bitimga ko‘ra, "Real Madrid" futbolchining keyingi transferidan 30 foiz ulush olish huquqini saqlab qoladi. Bundan tashqari, madridliklar Garsiyaga boshqa klub taklif bilan chiqqan taqdirda, o‘sha taklifni takrorlash va futbolchini qayta sotib olish bo‘yicha ustuvor huquqqa ham ega bo‘ladi.
Qayd etilishicha, transfer amalga oshishida "Fulhem" bosh murabbiyi Alvaro Arbeloaning roli katta bo‘lgan. U Gonsalo Garsiya bilan avval "Real Madrid" tizimida birga ishlagan va hujumchini jamoasiga olib kelishni shaxsan istagan.
Eslatib o‘tamiz, Gonsalo Garsiya "Real Madrid" akademiyasi tarbiyalanuvchisi hisoblanadi. Biroq asosiy tarkibda kuchli raqobat tufayli muntazam o‘yin amaliyotiga ega bo‘la olmadi va faoliyatini Angliya Premyer-ligasida davom ettirishga qaror qildi.
