Fred Grim kamida qishki tanaffusgacha «Ayaks»da qoladi
Niderlandiyalik mutaxassis Fred Grim kamida qishki tanaffusgacha «Ayaks» bosh murabbiyi sifatida faoliyatini davom ettiradi. Bu haqda u «Ekselsior»ga qarshi o‘yin oldidan o‘tkazilgan matbuot anjumanida ma’lum qildi.
Grim vaqtinchalik murabbiy sifatida Jon Xeyting o‘rniga tayinlangandi. Xeyting Yevropa Chempionlar Ligasi doirasidagi «Galatasaroy»ga qarshi uy uchrashuvidagi og‘ir mag‘lubiyatdan so‘ng klub tomonidan iste’foga chiqarilgan edi.
Klubga yangi bosh murabbiydan avval yangi texnik direktor kerak bo‘ladi. Grim bu borada hali aniq reja yo‘qligini ta’kidladi:
«Bu qanchalik tez sodir bo‘lishini hech kim ayta olmaydi. Oxir-oqibat menga qishki tanaffusgacha jamoani boshqarishim aytildi. Bu qanchalik aniq? Futbol — buni hammamiz bilamiz. Ko‘ramiz», — deya Grimning so‘zlarini keltiradi vi.nl.
«Ayaks» hozirgi vaqtda chempionat jadvalida to‘rtinchi o‘rinda bormoqda va peshqadam PSVdan 11 ochkoga ortda qolmoqda.
