«Flamengo» muxlislari boʻlgan avtobus agʻdarilib ketdi
Buenos-Ayresga qarab harakatlanayotgan «Flamengo» muxlislari boʻlgan avtobus Barra-Mansa shahri yaqinidagi shosseda agʻdarilib ketdi. Hodisa oqibatida 16 kishi tan jarohati olgan. Bu haqda Globo nashri xabar bermoqda.
Voqea joyiga favqulodda xizmatlar, yongʻin xavfsizligi boʻlimi va federal yoʻl politsiyasi xodimlari yetib kelgan.
«Flamengo» klubi rasmiy bayonotida shunday deyiladi:
«Buenos-Ayresga yoʻl olayotgan muxlislarimiz avtobusi bilan bogʻliq hodisadan xabar topdik. Klub Barra-Mansa meri Luis Furlani bilan bogʻlandi, u darhol jarohatlanganlarga yordam koʻrsatish uchun shahar kasalxonasini taqdim etdi.
Shuningdek, biz yongʻin xavfsizligi boshqarmasi bilan aloqadamiz va barcha zarur choralarni nazorat ostiga oldik. Voqeani diqqat bilan kuzatib bormoqdamiz».
Maʼlumot uchun, avtobus Buenos-Ayresga ketayotgan boʻlib, 30 oktyabr, payshanba kuni boʻlib oʻtadigan Libertadores kubogi yarim finalidan oʻrin olgan «Flamengo» — «Rasing» uchrashuvi uchun yoʻlga chiqqan edi.
