FIFA JCh-2026'da ogʻzini yopib gapirgan futbolchilarga qizil kartochka koʻrsatishni rejalashtirmoqda
Shuningdek, yana boshqa yangicha tartib joriy etilishi mumkinligi aytilmoqda.
FOTO: Getty Images
Xalqaro futbol federatsiyasi (FIFA) 2026 yilgi Jahon chempionatida yangicha tartib joriy etishni rejalashtirmoqda. Unga ko‘ra, raqib bilan mojaroli vaziyatlarda og‘zini yopib gapirgan futbolchilarga qizil kartochka ko‘rsatiladi. Bu haqda The Times nashri xabar bermoqda.
Manbaning ma’lumotlariga ko‘ra, shuningdek, hakam qarorlariga norozilik sifatida maydonni tark etgan futbolchilar ham chetlatilishi ko‘zda tutilgan.
FIFA prezidenti Janni Infantino ushbu o‘zgarishlar haqida tashkilotning 30 aprel, payshanba kuni Vankuverda bo‘lib o‘tadigan kongressida rasman ma’lum qilishi kutilmoqda. Ta’kidlanishicha, mazkur yangiliklar faqatgina bo‘lajak jahon birinchiligida qo‘llaniladi.
Nasrullo Karimov
Jurnalist