Eron terma jamoasi JCh-2026 oʻquv-mashg‘ulot yigʻinini AQShdan Meksikaga koʻchirdi
Eron terma jamoasi 2026 yilgi Jahon chempionati vaqtida Meksikada joylashadigan boʻldi. Xalqaro futbol federatsiyasi (FIFA) Eronning oʻquv-mashgʻulot yigʻini lagerini Tuson (Arizona, AQSh) shahridan Meksikaning chegara oldi Tixuana shahriga koʻchirish haqidagi soʻrovini maʼqulladi. Bu haqda ESPN xabar bermoqda.
Lagerni koʻchirish Eronga viza bilan bogʻliq qiyinchiliklardan qochish imkonini beradi, shuningdek, jamoa «Iran Air» reyslari orqali toʻgʻridan-toʻgʻri Meksikaga uchib kelishi mumkin boʻladi.
Eron terma jamoasi guruh bosqichining dastlabki ikki oʻyinini Los-Anjelesda oʻtkazadi: 15 iyun kuni Yangi Zelandiya, 21 iyun kuni esa Belgiya bilan toʻqnash keladi. Shundan soʻng, jamoa 26 iyun kuni Sietlda Misrga qarshi maydonga tushadi.
Maʼlumot uchun, 2026 yilgi Jahon chempionati 11 iyundan 19 iyulga qadar AQSh, Kanada va Meksika maydonlarida boʻlib oʻtadi.
