Eldor Adhamov bilan shartnoma muddati uzaytirildi
"Bizning sevimli jamoamizda yangi mavsum uchun katta ishtiyoq bilan olib borilayotgan oʻzgarishlar xususida oʻz vaqtida siz aziz muxlislarni xabardor etib kelmoqdamiz. Chunki ayni paytda eng avvalo seleksiya ishlaridagi yangiliklar barchani qiziqtirishi turgan gap.
Hozirgacha yangi kelayotgan futbolchilar bilan shartnomalar imzolanayotgani va safimizni tark etayotgan oʻyinchilar haqida rasmiy maʼlumotlar taqdim qilib boryapmiz.
Shu bilan bir qatorda shartnomasini uzaytirayotgan oʻyinchilar haqida ham siz aziz muxlislarni boxabar qilib boramiz.
Maʼlumki, 29 yoshli darvozabonimiz Eldor Adhamov 2020-yildan beri “Andijon” sharafini munosib himoya qilib kelmoqda. 2021-yilni qoʻqonliklar safida boshlagach, yarim yildan keyin yana jamoamizga qaytgan va shundan buyon “Burgutlar” aʼzosi boʻlib kelmoqda.
Eʼtiborlisi, Adhamov bilan amaldagi shartnoma uzaytirildi va u 2026-yilgi mavsumda ham jamoamiz sharafini himoya qilishda davom etadi.
Adhamov “Andijon” tarkibida shu paytgacha hammasi boʻlib 81 ta oʻyin oʻtkazdi va 21 ta uchrashuvda darvozasi daxlsizligini saqlagan.
Ishonamizki, yangi mavsumda ham u jamoamizning gʻalabalariga munosib hissasini qoʻshadi",-deb yoziladi klub rasmiy sahifasida.
