Dushan Vlahovich «Yuventus» bilan kelisha olmasa, «Barselona»ga o‘tishga tayyor
Serbiyalik hujumchi Dushan Vlahovich agar «Yuventus» bilan amaldagi shartnomasini uzaytirmasa, faoliyatini «Barselona»da davom ettirishi mumkin. Bu haqda Tuttosport nashri xabar bermoqda.
Manbaning ta’kidlashicha, forvard uchun ustuvor variant — Turin klubi bilan hamkorlikni davom ettirish. Biroq, agar tomonlar 2026 yilning yozida yakuniga yetadigan shartnomani yangilash borasida kelisha olishmasa, futbolchi kataloniyaliklar safiga erkin agent maqomida qo‘shilishni rejalashtirmoqda.
Hozirda hujumchi yangi bitim shartlarini muhokama qilish uchun «keksa sinyora» rahbariyati bilan uchrashuv tayinlashni so‘ragan.
Joriy mavsumda Vlahovich «Yuventus» safida barcha turnirlarda 17 ta o‘yinda maydonga tushib, 6 ta gol urdi va 2 ta golli uzatmani amalga oshirdi. Transfermarkt portali 26 yoshli hujumchining bozor qiymatini 35 million yevroga baholamoqda.
