Devid Bekxem va Garri Nevill birgalikda Angliya klubini sotib olishdi
“Manchester Yunayted”ning sobiq futbolchilari Devid Bekxem va Garri Nevill Angliyaning to'rtinchi divizionida to'p suradigan “Salford Siti”ni sotib olishdi. Bu haqda klub matbuot xizmati xabar berdi.
“Men Salfordda o'sganman. U yerda yashagan vaqtimni yaxshi xotiralar bilan eslayman. Bu joy va u yerdagi odamlar mening futbolchilik faoliyatimda muhim rol o'ynagan”, - deydi Bekxem.
The Athletic nashrining xabariga ko'ra, Bekxem va Nevill “Salford Siti” aksiyadori Piter Lim ketganidan so'ng bir necha oy davomida sarmoyaviy sheriklar izlagan.
Natijada ular Amerikaning Consello konsalting firmasi asoschisi Deklan Kelli va Lawn Tennis Assotsiatsiyasi raisi Lord Mervin Devis bilan birlashishdi. Ular “Salford Siti” direktorlar kengashining hamraislari bo'lishadi.