De Zerbi “Tottenham”ning asosiy muammosini aytdi
“Tottenham” bosh murabbiyi Roberto De Zerbi jamoaning hozirgi asosiy muammosi hujumdagi samarasizlik ekanini ta’kidladi. Londonliklar Angliya Liga kubogida “Liverpul”ga 1:3 hisobida mag‘lub bo‘lganidan so‘ng italiyalik mutaxassis jamoa yaratayotgan vaziyatlardan unumli foydalana olmayotganiga e’tibor qaratdi. Bu haqda “Tottenham” rasmiy sayti xabar bermoqda.
Manbaga ko‘ra, De Zerbi futbolchilardan darvoza tomon ko‘proq va aniqroq zarba berishni talab qilmoqda. Uning fikricha, “Tottenham” vaziyat yaratmoqda, biroq hal qiluvchi pallada zarba sifati va imkoniyatlardan foydalanish borasida yetishmovchilik sezilmoqda. “Liverpul”ga qarshi bahsda jamoa 17 marta zarba berganiga qaramay, faqat bir gol ura oldi.
“Shporlar”ning hujumdagi muammosi mavsum boshidan beri davom etmoqda. Jamoa Premyer liganing dastlabki to‘rt uchrashuvida umuman gol ura olmadi va klub tarixida ilk bor mavsumni shunday ko‘rsatkich bilan boshladi. “Liverpul”ga qarshi urilgan gol esa “Tottenham”ning so‘nggi to‘rtta uchrashuvdagi ilk goli bo‘ldi.
Ma’lumot uchun, “Tottenham” joriy mavsum barcha musobaqalarni hisobga olganda o‘tkazgan dastlabki olti uchrashuvining faqat bittasida g‘alaba qozongan. De Zerbi esa natijalarga qaramay, jamoaning o‘yinida ijobiy jihatlar borligini va hujumdagi aniqlik oshsa, natijalar ham yaxshilanishiga ishonishini bildirmoqda.
