De Yong og‘ir jarohat oldi, to‘rt oyga safdan chiqishi mumkin
«Barselona» va Niderlandiya terma jamoasi yarim himoyachisi Frenki de Yong milliy jamoa yig‘inida tizzasidan jarohat oldi. Bu haqda Marca nashri xabar berdi.
Manbaga ko‘ra, futbolchi jarohat bilan Kataloniya klubi ixtiyoriga qaytgan. Hozircha uning aniq tashxisi qo‘yilmagan. Yaqin kunlarda de Yong qo‘shimcha tibbiy tekshiruvlardan o‘tadi. «Barselona» rahbariyati esa futbolchining holatidan jiddiy xavotirda.
Dastlabki ma'lumotlarga ko‘ra, niderlandiyalik yarim himoyachi to‘rt oygacha maydondan chetda qolishi mumkin. Agar bu taxmin tasdiqlansa, de Yong joriy mavsumning katta qismini o‘tkazib yuborishi ehtimoldan xoli emas.
Eslatib o‘tamiz, u o‘tgan mavsumda ham son mushaklari jarohati tufayli fevral oyi oxiridan aprel boshigacha qariyb ikki oy maydonga tushmagan edi. Bundan tashqari, de Yong avval ikki marta to‘pig‘idan jarohat olib, jami olti oy va 31 ta uchrashuvni o‘tkazib yuborgan.
