Chicharito: «Ronaldu yana barcha tanqidchilarni jim qildirdi»
"Real" va "Manchester United" klublarining sobiq hujumchisi Xavyer Ernandes (Chicharito) Portugaliya terma jamoasi sardori Krishtianu Ronalduning 2026 yilgi Jahon chempionati 1/16 finalida Xorvatiyaga qarshi o‘yiniga yuqori baho berdi.
Mazkur uchrashuvda Portugaliya 2:1 hisobida g‘alaba qozondi. 41 yoshli Ronaldu 68-daqiqada penaltidan gol urib, jamoasining muvaffaqiyatiga hissa qo‘shdi.
FOX Sports efirida so‘zga chiqqan Chicharito portugaliyalik yulduzning professionalligi va jismoniy tayyorgarligiga alohida e’tibor qaratdi.
"Birinchi o‘yindan keyin Ronaldu qattiq tanqid qilindi. Ikkinchi bahsda esa unga imkoniyatlar yaratildi va u har doimgidek gol urdi.
41 yoshda, hisobida 976 ta gol bor va u hali ham orqaga soatiga 30 kilometr tezlikda qaytib yugurmoqda. Bugun u yana barcha tanqidchilarni jim qildirdi. U hamma uchun namunadir", — dedi Chicharito.
