Chempionlar Ligasidagi omadsizlikka qaramay «Yuventus» Spalletti bilan shartnomani uzaytirmoqchi
«Yuventus» direktori Jorjo Kellini jamoaning Chempionlar Ligasidan chiqib ketishiga qaramay, bosh murabbiy Luchano Spallettiga to‘liq ishonch bildirdi. Eslatib o‘tamiz, turinliklar ikki o‘yin natijasiga ko‘ra Turkiyaning «Galatasaroy» klubiga imkoniyatni boy berib, nufuzli musobaqadagi ishtirokini yakunlagan edi.
Taniqli insayder Fabrisio Romanoning xabar berishicha, Kellini murabbiyning kelajagi borasidagi savollarga quyidagicha javob bergan:
«Luchano Spalletti bilan yangi shartnoma imzolash masalasi bizda hech qachon shubha uyg‘otmagan. Bu klubning asosiy ustuvor vazifalaridan biri hisoblanadi. Tez orada biz kelishuvning barcha tafsilotlarini muhokama qilish uchun uchrashamiz».
Spalletti «Yuventus» boshqaruviga 2025 yilda kelgan bo‘lib, uning amaldagi shartnomasi 2026 yilning yoziga qadar mo‘ljallangan. Garchi jamoa yevrokuboklar bilan xayrlashgan bo‘lsa-da, rahbariyat tajribali mutaxassis bilan hamkorlikni davom ettirish niyatida.
Ma’lumot uchun, ushbu mavsumning Chempionlar Ligasi finali 2026 yil 30 may kuni Budapeshtdagi «Pushkash Arena» stadionida bo‘lib o‘tadi.
