«Chelsi» va yana uchta klub «Yuventus» yarimhimoyachisiga qiziqish bildirmoqda
Italiyaning «Yuventus» klubiga tegishli bo‘lgan va hozirda ijara asosida Angliyaning «Nottingem Forest» jamoasida to‘p surayotgan yarimhimoyachi Duglas Luisga bir qator klublar qiziqish bildirmoqda. Bu haqda jurnalist Nikolo Skira ma’lum qildi.
Manbaga ko‘ra, 27 yoshli braziliyalik futbolchining xizmatlariga «Chelsi», «Aston Villa», Braziliyaning «Vasko da Gama» klubi hamda Niderlandiyaning «Ayaks» jamoasi qiziqish bildirmoqda. Qayd etilishicha, Duglas Luis yanvar oyidagi transfer oynasida «Nottingem Forest»ni tark etishi mumkin.
«Yuventus» futbolchini to‘liq transfer asosida qo‘yib yuborishga tayyor. Turinliklar ijara + majburiy sotib olish sharti bilan amalga oshiriladigan bitim uchun 28,5 mln yevro talab qilmoqda», — deb yozdi Skira.
Joriy mavsumda Duglas Luis Angliya Premyer-ligasida sakkizta uchrashuvda maydonga tushdi. Shuningdek, u Yevropa Ligasida to‘rtta o‘yin o‘tkazib, bitta golli uzatmani amalga oshirgan.
