«Chelsi» «Milan» himoyachisi Straxiya Pavlovichga qiziqish bildirmoqda
Londonning «Chelsi» klubi «Milan» markaziy himoyachisi Straxiya Pavlovichning xizmatlariga qiziqish ko‘rsatmoqda. «Aristokratlar» 24 yoshli futbolchining vakillari bilan bog‘lanishgan. Bu haqda Corriere dello Sport nashri xabar bermoqda.
Manbaning ma’lum qilishicha, ushbu transferni amalga oshirish uchun kamida 40 million yevro miqdorida taklif yuborilishi kerak. Chunki «Milan» rahbariyati Pavlovichni jamoaning asosiy va muhim o‘yinchilaridan biri deb hisoblaydi.
Joriy mavsumda serbiyalik himoyachi barcha turnirlar doirasida 30 ta o‘yinda maydonga tushib, 4 ta gol va 1 ta golli uzatmani o‘z hisobiga yozdirib qo‘ydi. Futbolchining klub bilan amaldagi shartnomasi 2028-yilning yoziga qadar mo‘ljallangan. Transfermarkt portali ma’lumotlariga ko‘ra, Pavlovichning bozor qiymati 35 million yevroni tashkil etadi.
