«Chelsi» Liga 1’ning 18 yoshli himoyachisi uchun 30 million yevro taklif qildi
Londonning «Chelsi» klubi «Nant»ning iqtidorli markaziy himoyachisi Tilel Tati uchun norasmiy taklif yubordi. Biroq, Fransiya klubi bu taklifni rad etdi. Bu haqda nufuzli L'Équipe nashri xabar bermoqda.
Manbaning yozishicha, «aristokratlar» 18 yoshli futbolchini sotib olgan taqdirda ham, uni mavsum oxirigacha «Nant»da ijara asosida qoldirishni rejalashtirgan edi. Shunga qaramay, ushbu transferning amalga oshish ehtimoli ancha past deb baholanmoqda. Buning asosiy sababi — transfer oynasi yopilishiga (2 fevralga qadar) juda oz vaqt qolganidir.
Tilel Tati joriy mavsumda barcha turnirlar doirasida 19 ta uchrashuvda maydonga tushdi. Yosh bo‘lishiga qaramay, u jamoasining muhim o‘yinchilaridan biriga aylanib ulgurgan.
Himoyachining «Nant» bilan amaldagi shartnomasi 2028 yilning yoziga qadar mo‘ljallangan. Transfermarkt portali ayni damda fransuz iqtidorini 12 million yevroga baholamoqda.
