“Chelsi” Fermin Lopes uchun 120 million yevrodan ortiq taklif tayyorlamoqda — manba
“Chelsi” “Barselona” yarim himoyachisi Fermin Lopes transferiga jiddiy qiziqish bildirmoqda. El Nacional ma’lumotiga ko‘ra, London klubi 23 yoshli ispaniyalik futbolchi uchun 120 million yevrodan ortiq mablag‘ taklif qilishga tayyor.
Manbaning yozishicha, “Chelsi” bosh murabbiyi Xabi Alonso Ferminni jamoaning asosiy transfer maqsadlaridan biri sifatida ko‘rmoqda. Klub rahbariyati ham murabbiyning talabini qondirish va futbolchini Londonga olib kelish uchun katta mablag‘ sarflashga tayyor.
“Barselona” Ferminni sotishni rejalashtirmayapti, biroq 120 million yevrodan yuqori taklif kataloniyaliklarni muzokaraga undashi mumkinligi aytilmoqda. Joriy mavsumda yarim himoyachi barcha musobaqalarda 5 ta uchrashuvda maydonga tushib, 4 ta gol va 2 ta golli uzatma qayd etgan.
Ma’lumot uchun, Fermin Lopes 2026-yil fevralida “Barselona” bilan shartnomasini uzaytirgan. Uning amaldagi kelishuvi 2031-yil 30-iyungacha mo‘ljallangan.
