“Chelsi” Estevaoning kelajagi bo'yicha bir qarorga keldi
“Chelsi” braziliyalik vinger Estevao Villian bo‘yicha qat’iy qarorga kelgan. 19 yoshli futbolchiga “Real Madrid” va “Barselona” jiddiy qiziqish bildirayotganiga qaramay, London klubi uni yaqin kelajakda sotishni rejalashtirmayapti. Bu haqda TEAMtalk nashri xabar bermoqda.
Manbaga ko‘ra, “Real” va “Barselona” Estevaoni hali “Palmeyras” safida o‘ynagan davridan buyon kuzatib keladi va hozir ham uning rivojlanishini diqqat bilan nazorat qilmoqda. Biroq “Chelsi” braziliyalik futbolchini katta salohiyatga ega uzoq muddatli loyiha sifatida ko‘rmoqda va u bilan xayrlashish niyatida emas.
Estevaoning o‘zi ham ayni paytda London klubini tark etishni o‘ylamayapti. Xabarlarga ko‘ra, futbolchi “Chelsi”dagi hayotidan mamnun va Xabi Alonso jamoasida asosiy tarkib futbolchisiga aylanishni maqsad qilgan. Shu sababli Ispaniya grandlarining qiziqishi hozircha braziliyalikning kelajagiga ta’sir qilmayapti.
Ma’lumot uchun, Estevao “Chelsi”ga “Palmeyras”dan taxminan 29 million funt evaziga kelib qo‘shilgan. Uning London klubi bilan amaldagi shartnomasi 2033-yilgacha mo‘ljallangan. Joriy mavsumda braziliyalik futbolchi barcha turnirlar doirasida 6 ta uchrashuvda maydonga tushgan, Transfermarkt esa uning bozor qiymatini 80 million yevroga baholamoqda.
