«Chelsi» bosh murabbiyligi uchun asosiy nomzod maʼlum boʻldi
«Strasburg» bosh murabbiyi Liam Rozenyor «Chelsi»ning yangi bosh murabbiyi lavozimi uchun asosiy nomzod hisoblanadi. Bu haqda mashhur insayder Fabritsio Romano ma’lum qildi.
Manbaga ko‘ra, London klubi rahbariyati mutaxassis faoliyatini yuqori baholamoqda va ayni vaqtda u qisqa ro‘yxatdagi eng asosiy da’vogar sifatida ko‘rilmoqda. «Strasburg» esa «Chelsi» tomonidan rasmiy muzokaralar boshlanishi ehtimolini inobatga olib, allaqachon ehtimoliy o‘rinbosar variantlarini ko‘rib chiqmoqda.
Eslatib o‘tamiz, 1 yanvar kuni «Chelsi» bosh murabbiy Enzo Mareska bilan tuzilgan shartnomani bekor qilgandi.
Liam Rozenyor qo‘l ostida «Strasburg» Fransiya chempionatining 16-turidan so‘ng turnir jadvalida sakkizinchi o‘rinni egallab turibdi. Jamoa 23 ochko jamg‘argan va yetakchi «Lans»dan 14 ochkoga ortda qolmoqda.
