“Chelsi” Abduqodir Husanovni sotib olmoqchi
Londonning “Chelsi” klubi “Manchester Siti” va O‘zbekiston terma jamoasi himoyachisi Abduqodir Husanovga qiziqish bildirmoqda. Londonliklar 22 yoshli futbolchining transferini qishki transfer oynasida amalga oshirish imkoniyatini ko‘rib chiqmoqda. Bu haqda CaughtOffside xabar berdi.
Manbaga ko‘ra, “Chelsi” mavsum boshidagi himoyaviy muammolardan so‘ng markaziy himoya chizig‘ini kuchaytirishni rejalashtirgan. Londonliklar Premyer-liganing dastlabki besh uchrashuvida 12 ta gol o‘tkazib yuborgan. Shu sababli Husanov klubning e’tiboridagi variantlardan biriga aylangan.
Hozircha tomonlar o‘rtasida rasmiy muzokara yoki transfer bo‘yicha kelishuv borligi haqida ma’lumot yo‘q. Shuningdek, Premyer-liganing yana uch klubi o‘zbekistonlik himoyachining vaziyatini kuzatayotgani aytilmoqda.
Ma’lumot uchun, Abduqodir Husanov 2025-yil yanvarida “Lans”dan “Manchester Siti”ga ko‘chib o‘tgan. 2026-yil yozida himoyachi klub bilan yangi besh yillik shartnoma imzoladi va uning amaldagi kelishuvi 2031-yilgacha mo‘ljallangan.
