Bugun «Andijon» nazorat uchrashuvida ishtirok etadi
Antaliyada yigʻin oʻtkazayotgan “Andijon” rejaga koʻra, 16-yanvar kuni oʻzini ikkinchi nazorat uchrashuvida maydonga tushadi.
Xabaringiz bor, ilk bellashuv 13-yanvarda oʻtkazilgan boʻlib, unda “Burgutlar” Turkiyaning “Siverek Belediyespor” jamoasini 3:0 hisobida magʻlubiyatga uchratgandilar.
Navbatdagi sparring-raqib esa Vengriyaning “Vashash” klubidir. Bu Budapesht shahri jamoasi hisoblanadi. Aytish lozimki, 1911-yilning 16-mart sanasida ushbu klubga asos solingan.
Vengiya milliy chempionati II da ishtirok etayotgan klub ayni paytda turnir jadvalida 2-oʻrinni egallab turibdi. 15 ta turdan soʻng 9 gʻalaba, 2 durang va 4 magʻlubiyat qayd etib, toʻplar nisbati 25\15 ni tashkil qilgan holda 29 ochko jamgʻarib turibdi. Jamoani 45 yoshli mahalliy mutaxassis Gabor Erosh boshqarmoqda.
“Vashash” klubi Antaliya yigʻinidagi dastlabki uchrashuvini Qirgʻizistonning “Aziya Talas” klubiga qarshi oʻtkazdi va unda 4:0 hisobida gʻalaba qozondi. Xuddi biz kabi navbatdagi oʻyin ham raqib uchun Antaliyadagi ikkinchi uchrashuvga aylanadi.
Shuningdek, bu klub oʻz tarixida 6 karra Vengriya chempioni hamda 4 bor Kubok sohibi sanaladi.
“Andijon”ni “Vashash”ga qarshi qiziqarli oʻyin kutmoqda. Bellashuv Toshkent vaqti bilan 18:00 da boshlanadi.
