Bu guruhda hech kimga qur'a omad keltirmadi. I guruhi diqqat markazida
Jahon chempionati 48 jamoaga kengaytirilganidan so‘ng, guruh bosqichining sifati pasayishi haqida xavotirlar kuchaygan edi. I guruhi esa istisno bo‘lib ko‘rinmoqda. Fransiya, Senegal, Norvegiya va Iroq hattoki eski formatda ham kuchli guruh tuzishi mumkin edi.
Bu yerda aniq favorit, pley-off darajasidagi ikki jamoa va 40 yildan so‘ng mundialga qaytgan noma’lum autsayder bor.
Fransiya
Murabbiy
Didye Desham — nafaqat buyuk futbolchi, balki ulkan murabbiy ham. U futbolchi sifatida 103 o‘yin o‘tkazib, jamoa sardori sifatida jahon va Yevropa chempionatlarida g‘olib chiqqan.
Murabbiy sifatida esa u o‘z natijalarini ham ortda qoldirdi: 14 yil, 177 o‘yin, JChda oltin va kumush, Yevropada esa kumush medal.
Fransiya Desham qo‘l ostida doimo jozibali o‘ynamaydi, ammo har doim amaliy va har qanday raqib uchun juda qiyin jamoa bo‘lib qoladi. Bu jamoada nafaqat tarkib, balki uzoqqa borish odati ham bor.
Turnirdan so‘ng Desham ketishi kutilmoqda va uning o‘rnini ehtimol Zinedin Zidan egallaydi.
Yulduzlar
Fransiya tarkibi yulduzlarga boy: Usmon Dembele, Dezire Due, Vilyam Saliba, Maykl Olise va Kilian Mbappe. Fransiyaning kuchi faqat nomlardagina emas — barcha chiziqlar muvozanatli. Ayniqsa, Ngolo kabi tajribali futbolchi qisqa turnirlarda juda muhim.
Maqsad
Fransiya turnirning asosiy favoritlaridan biri. Yarim final yoki finaldan past natija qoniqarli emas.
So‘nggi yillarda JChda:
1998 va 2018 — chempion
2006 va 2022 — final
Barcha o‘y-xayollar — uchinchi chempionlik haqida.
Chempionlik ehtimoli (Opta): 12,67%
Senegal
Murabbiy
Pape Tiau — 2002 yildagi sensatsion jamoa bilan bog‘liq shaxs. O‘sha mundialda u Anri Kamaraning hal qiluvchi goliga assist bergan.
2024 yil dekabrda termani qabul qilib, jamoani ishonchli tarzda mundialga olib chiqdi.
Yulduzlar
Senegal tarkibi tajribali futbolchilardan iborat: Eduard Mendi, Kalidu Kulibali, Idrissa Guye, Nikolas Jekson. Asosiy yulduz — Sadio Mane.
Maqsad
Kamida pley-off. Optimistik ssenariy — chorak finalgacha yetib borish.
Chempionlik ehtimoli (Opta): 0,96%
Norvegiya
Murabbiy
Stole Solbakken uzoq yillar “Kopengagen”ni boshqarib, katta yutuqlarga erishgan. 2020 yildan buyon Norvegiya termasini boshqarmoqda.
Yulduzlar
Asosiy figura — Erling Holand. Uning statistikasi hayratlanarli: 50 o‘yinda 55 gol. Uning asosiy sherigi — Martin Edegor.
Maqsad
1/16 finalga chiqish — minimal vazifa. Yaxshi holatda Norvegiya sensatsiyaga aylanishi mumkin.
Chempionlik ehtimoli: 3,24%
Iroq
Murabbiy
Grem Arnold — tajribali mutaxassis. Ilgari Avstraliya terma jamoasini boshqargan. 2025 yilda Iroqni qiyin vaziyatdan chiqarib, mundialga olib chiqdi.
Yulduzlar
Katta superyulduzlar yo‘q, ammo quyidagilar ajralib turadi: Ahmad Qosim, Aymen Hussayn, Zidan Iqbol.
Maqsad
Hech bo‘lmasa bir ochko olish — katta yutuq. Pley-offga chiqish sensatsiya bo‘ladi.
Chempionlik ehtimoli (Opta): 0,06%
