“Borussiya” bosh murabbiy bilan shartnomani 2029-yilgacha uzaytirdi
Dortmundning “Borussiya” klubi bosh murabbiy Niko Kovach bilan hamkorlikni davom ettirishga qaror qildi. Germaniya klubi 54 yoshli xorvatiyalik mutaxassis bilan 2029-yilning 30-iyunigacha mo‘ljallangan yangi shartnoma imzoladi. Bu haqda “Borussiya” klubi matbuot xizmati xabar bermoqda.
Manbaga ko‘ra, Kovachning avvalgi shartnomasi 2027-yil yozida yakunlanishi kerak edi. Biroq klub rahbariyati murabbiyning faoliyatidan mamnun bo‘lib, kelishuvni muddatidan oldin yana ikki yilga uzaytirishga qaror qilgan. Shuningdek, uning yordamchilari Robert Kovach va Filip Tapalovich bilan ham 2029-yilgacha yangi shartnomalar imzolangan.
Niko Kovach “Borussiya” boshqaruvini 2025-yil boshida qabul qilib olgan. Uning qo‘l ostida jamoa dastlab Bundesligada to‘rtinchi o‘rinni egallab, UEFA Chempionlar ligasiga yo‘llanma olgan. Keyingi mavsumda esa dortmundliklar Germaniya chempionatini ikkinchi o‘rinda yakunlagan.
Ma’lumot uchun, “Borussiya” 2026/27-yilgi Bundesliga mavsumining dastlabki besh turida 13 ochko jamg‘arib, turnir jadvalida ikkinchi o‘rinni egallab turibdi. Jamoa navbatdagi uchrashuvini 17-oktabr kuni safarda Berlinning “Union” klubiga qarshi o‘tkazadi.
